នៅ​ម៉ោង ០២:០០ នាទី​យប់​នេះ គឺ​ជា​លើក​ដំបូង​សម្រាប់ Cristiano Ronaldo ក្នុង​ការ​ចូលរួម​នៅ​ពាន​រង្វាន់ Europa League ដែល​ជា​ពាន​លំដាប់​ទី​ពីរ​របស់​សមាគម​បាល់ទាត់​អឺរ៉ុប​ UEFA។ ក្លឹប​ម្ចាស់ដី Old Trafford កំណត់​បើក​កីឡដ្ឋាន​ស្វាគមន៍​ក្លឹប​អេស្ប៉ាញ Real Sociedad នៅ​ជុំ​ទី ១ វគ្គ​ចែក​ពូល មាន​ផ្សាយ​ផ្ទាល់​លើ​ទំព័រ CTS SPORT។

បើ​ទោះ​បី​ឈ្មោះ​កំពុង​លេង​នៅ​ពាន Europa តែ​អតីតកាល​បុរស​សញ្ជាតិ​ព័រទុយហ្គាល់​ក៏​បាន​បន្សល់​ទុក​នូវ​កេរ្តិ៍ឈ្មោះ និង​កំណត់ត្រា​ឯកត្តជន​ជា​ច្រើន​រាប់​ភ្លេច​នៅ​ពាន UCL ដល់​ថ្នាក់​អ្នក​គាំទ្រ និង​អ្នក​អធិប្បាយ​លើ​ប៉ុស្តិ៍​ទូរទស្សន៍​ជា​ច្រើន ដាក់​រហស្សនាម​ឲ្យ​កីឡាករ​វ័យ ៣៧ ឆ្នាំ ជា ‘Mr Champions League’។ យើង​ធ្វើ​ការ​បង្ហាញ​កំណត់ត្រា​ទាំង ១១ នៅ​បន្ត​គ្រោង​ដោយ​ឈ្មោះ Ronaldo មក​ទល់​សព្វថ្ងៃ៖

១) រក​បាន​គ្រាប់​បាល់​ច្រើន​បំផុត – វា​ជា​កំណត់ត្រា​ដែល​ពិបាក​នឹង​បំបែក​បាន ហើយ​តួ​លេខ​ក៏​នៅ​បន្ត​អាច​កើន​ឡើង​ដរាប​ណា​ Ronaldoមិន​ទាន់​ចូល​និវត្ត នោះ​គឺ ១៤០ គ្រាប់ នៅ ១៩ រដូវ​កាល​ UCL នាំ​មុខ​លើ Lionel Messi មាន ១២៥ គ្រាប់ និង Robert Lewandowski មាន ៨៩ គ្រាប់។

២) ជា​អ្នក Assist ច្រើន​បំផុត – Ronaldo បញ្ជូន​បាល់​ឲ្យ​មិត្ត​រួម​ក្រុម​បញ្ចប់​ទី ៤២ លើក នាំ​មុខ​ទៅ​លើ Messi មាន ៣៦ លើក និង Di Maria មាន ៣៥ លើក។

៣) ជា​កីឡាករ​ឈ្នះ​ពាន​ច្រើន​បំផុត – បើ​រាប់​នៅ​សម័យ​កាល Champions League បង្កើត​ឡើង​ក្នុង​ឆ្នាំ ១៩៩២ នោះ Ronaldo និង​កីឡាករ​មួយ​ចំនួន​ទៀត​ដូច​ជា Toni Kroos និង Gareth Bale ​ជា​ដើម ជា​អ្នក​លើក​ពាន​ច្រើន​បំផុត​ដល់​ទៅ ៥ សម័យ​កាល តែ​បើ​រាប់​ជា​រួម​ក្នុង​ប្រវត្តិសាស្ត្រ​ពាន​រង្វាន់​អឺរ៉ុប តាំង​ពី​ជំនាន់​នៅ​ប្រើ​ឈ្មោះ European Cup គឺ​នៅ​ចាញ់​អតីត​កីឡាករ​មួយ​រូប គឺ Paco Gento ឈ្នះ​បាន ៦ លើក។

៤) ជា​កីឡាករ​ស៊ុត​ Free-Kick ចូល​ទី​ច្រើន​បំផុត – គ្រាប់​បាល់ Free-Kick នៅ UCL សម្រាប់ Ronaldo ធ្វើ​បាន ១២ លើក ច្រើន​ជាង​ម្ចាស់​កំណត់ត្រា​ចាស់ លោក Alessandro del Piero ធ្វើ​បាន ១១ លើក។

៥) ជា​កីឡាករ​ស៊ុត​ Penalty ចូល​ទី​ច្រើន​បំផុត – Ronaldo ធ្វើ​បាន ១៩ គ្រាប់ តាម​រយៈ​ការ​ស៊ុត​បាល់​ ១១ ម៉ែត្រ តែ​នេះ​កំពុង​តាម​យ៉ាង​ប្រកិត​ដោយ Messi មាន ១៨ គ្រាប់ ហើយ Lewandowski មាន ១៦ គ្រាប់។

៦) រក​បាន​គ្រាប់​បាល់​ច្រើន​បំផុត​នៅ​វគ្គ Knockout stage – រាប់​ពី​វគ្គ ១៦ ក្រុម​ឡើង​ទៅ មិន​រាប់​វគ្គ​ចែក​ពូល គឺ Ronaldo ជា​អ្នក​មាន​គ្រាប់​បាល់​ច្រើន​បំផុត​ដល់​ទៅ ៦៧ គ្រាប់។

៧) រក​បាន​គ្រាប់​បាល់​ច្រើន​បំផុត​នៅ​វគ្គ ៨ ក្រុម – នៅ​វគ្គ​ ៨ ក្រុម ឬ ១/៤ ផ្តាច់ព្រ័ត្រ ក៏​ CR7 ជា​អ្នក​គ្រោង​កំណត់ត្រា​នេះ​ផង​ដែរពោល​គឺ​ធ្វើ​បាន ២៥ គ្រាប់។

៨) រក​បាន​គ្រាប់​បាល់​ច្រើន​បំផុត​នៅ​វគ្គ ៤ ក្រុម – នៅ​វគ្គ​ ៤ ក្រុម ឬ ពាក់​កណ្តាល​ផ្តាច់ព្រ័ត្រ ក៏​ជា​ឈ្មោះ​កីឡាករ​ព័រទុយហ្គាល់ ធ្វើ​បាន ១៣ គ្រាប់ ឲ្យ​ក្លឹប Real Madrid និង Man Utd។

៩) រក​បាន​គ្រាប់​បាល់​ច្រើន​បំផុត​នៅ​វគ្គ​ផ្ដាច់ព្រ័ត្រ – នៅ​វគ្គ​កាត់​សេចក្តី​លើក​ពាន​រង្វាន់ ក៏ Ronaldo ជា​អ្នក​រក​បាន​ច្រើន​គ្រាប់​បំផុត​ផង​ដែរ នោះ​គឺ ៤ គ្រាប់ នាំ​មុខ​លើ Gareth Bale ជា​អ្នក​ឈរ​ចំណាត់ថ្នាក់​បន្ទាប់ មាន ៣ គ្រាប់។

១០) រក​បាន​គ្រាប់​បាល់​ច្រើន​បំផុត​ប្រចាំ​រដូវ​កាល​ទោល – នៅ​ព្រឹត្តិការណ៍​រដូវ​កាល​ទោល Champions League គឺ Ronaldo ជា​អ្នក​រក​បាន​ច្រើន​បំផុត​ដល់​ទៅ ២ លើក ពោល​នៅ​រដូវ​កាល ២០១៥/១៦ ធ្វើ​បាន ១៦ គ្រាប់ និង​រដូវ​កាល ២០១៣/១៤ ធ្វើ​បាន ១៧ គ្រាប់។

១១) Hat-trick ​ច្រើន​ដាច់​គេ – កំណត់ត្រា​នេះ Ronaldo ចែក​គ្នា​ស្មើ​នឹង Messi ដោយ​បញ្ចប់​ទី​គ្រាប់​បាល់ Hat-trick ៨ លើក​ដូច​គ្នា។ កីឡាករ​អាហ្សង់ទីន​ធ្វើ​បាន​ឲ្យ Barcelona រី​ឯ​កីឡាករ​ព័រទុយហ្គាល់​ធ្វើ​បាន​ឲ្យ​ក្លឹប Real Madrid ៧ លើក និង Juventus ១ លើក៕

ប្រភព៖ បរទេស