- wolf246@gmail.com
4 Sensitive Things You Should Know Before Opening El Clasico This Weekend
- Saturday 10 April 2021
- 08:14 AM
នៅវេលាម៉ោង ០២:០០ នាទីរំលងអាធ្រាត្រ ឈានចូលថ្ងៃអាទិត្យ ទី ១១ មេសាលើទំព័រ CTS Sports នឹងមានការផ្សាយផ្ទាល់នៅជំនួប El Clasico ដែលជាការប៉ះគ្នារវាងក្លឹប Real Madrid និង Barcelona នៅឯកីឡដ្ឋាន Alfredo di Stefano។
ដើម្បីញាំងឲ្យការប្រកួតមួយនេះ កាន់តែមានភាពក្តៅគគុក យើងសូមធ្វើការបង្ហាញនូវចំណុចរសើប ៤ ដែលអ្នកគួរតែដឹងអំពីជំនួប El Clasico ជើងទី ២ ប្រចាំរដូវកាល ២០២០/២១៖
១) ប្រវត្តិធ្លាប់ជួបគ្នា
នៅថ្ងៃអាទិត្យនេះគឺជាការប្រកួតលើកទី ២៧៩ ដោយកន្លងមក Real Madrid ឈ្នះ ១០១ Barcelona ឈ្នះ ១១៥ និងស្មើគ្នា ៦២ លើក។ នៅជើងទី ១ រដូវកាលនេះ Barcelona បានរងបរាជ័យ ៣-១ ដោយកាលនោះ Fati ជាអ្នករកបានមួយគ្រាប់ ហើយខាង Madrid ធ្វើបានដោយ Valverde, Ramos និង Mordic។
២) កំណត់ត្រារបស់ Lionel Messi
ហេតុផលដែលយើងលើកតែឈ្មោះ Messi មកបង្ហាញ នោះក៏ដោយសារកំណត់ត្រាភាគច្រើនគឺមានតែលោកម្នាក់គត់ដែលនៅបន្តឈរជើង ខណៈអ្នកឯទៀតខ្លះបានផ្ទេរទៅក្លឹបដទៃ និងខ្លះចូលនិវត្តបាត់ទៅហើយ។
សម្រាប់ M10 មានកំណត់ត្រាធំមួយ ដែលគេនឹងអាចធ្វើបាននៅជំនួប El Clasico ខាងមុខ នោះគឺការបង្ហាញខ្លួនច្រើនប្រកួតបំផុត ដោយអាចតាមស្មើតួលេខរបស់ Sergio Ramos។ បច្ចុប្បន្ន Messi មាន ៤៤ ប្រកួត ខណៈ Ramos មាន ៤៥ ប្រកួត។
ដោយឡែកមានកំណត់ត្រាធំ ៣ ផ្សេងទៀត ដែល Messi កំពុងឈរនៅចំណាត់ថ្នាក់កំពូលប្រចាំការប្រកួត។ តួយ៉ាងដូចជាការរកគ្រាប់បាល់ច្រើនបំផុត ដែលមាន ២៦ គ្រាប់ តាមពីក្រោយដោយ Di Stefano និង Cristiano Ronaldo មាន ១៨ គ្រាប់ ហើយកំណត់ត្រាមួយទៀតគឺការ Assist ដែលកីឡាករអាហ្សង់ទីនធ្វើបានច្រើនជាងគេដល់ទៅ ១៤ លើក។ ចុងក្រោយគឺកំណត់ត្រាជាប់ឈ្មោះជាមួយវីរបុរស ៥ រូបឯទៀតមាន Jaime Lazcano, Santiago Bernabeu, Paulino Alcantara និង Ferenc Puskas ដោយបុគ្គលទាំងនេះជាអ្នករកបានគ្រាប់បាល់ Hat-Trick ចំនួន ២ លើកនៅ El Clasico។
៣) កីឡាករដែលអាចអវត្តមាន
សម្រាប់ Real Madrid អាចនឹងខកខានខ្សែការពារសំខាន់ដល់ទៅ ៣ រូប មាន Dani Carvajal, Sergio Ramos និង Raphael Varane ហើយនៅតំបន់ប្រយុទ្ធ Eden Hazard ក៏មិនប្រាកដប្រជានោះដែរ។ បែបនេះប្រព័ន្ធកីឡាករដែល Zidane នឹងប្រើប្រាស់ អាចដូចគ្នា ៩៥ ភាគរយ ធៀបនឹងប្រព័ន្ធដែល Real លេងតទល់ Liverpool នៅ UCL។
ដោយឡែកសម្រាប់ Barcelona នឹងអវត្តមានកីឡាករសំខាន់ៗដូចជា Philippe Coutinho, Ansu Fati Gerard Pique និង Neto Moura។ បែបនេះលោក Ronaldo Koeman ទំនងជាបន្តប្រើប្រាស់ប្រព័ន្ធ ៣-៤-២-១ ដែលដាក់ De Jong នៅការពារក្រោម ហើយអមដោយស្លាប Lenglet និង Mingueza។
៤) នេះអាចក្លាយជាប្រកួត El Clasico លើកចុងក្រោយរបស់ Messi
ជាការពិតពាក់ព័ន្ធនឹងស្ថានភាពចរចាលើការបន្តកុងត្រាថ្មី សម្រាប់ Lionel Messi មិនទាន់ចេញតម្រុយវិជ្ជមាន ១០០ ភាគរយនៅឡើយទេ ដោយក្តីសង្ឃឹមនៃការចាកចេញក៏នៅតែអាចកើតមាន។
បែបនេះប្រសិន M10 សម្រេចចែកផ្លូវជាមួយ Barca ត្រឹមរដូវកាលនេះ ក៏មានន័យថា ប្រកួត El Clasico លើកទី ៤៥ គឺជាប្រកួតលើកចុងក្រោយក្នុងអាជីពរបស់ខ្លួន។ មួយផ្សេងទៀតប្រសិនណា Sergio Ramos ខកខានការប្រកួតនៅចុងសប្ដាហ៍ ហើយត្រូវចាកចេញនៅបញ្ចប់រដូវកាលដែរនោះ ក៏សម្រេចបានថា កំណត់ត្រាកីឡាករបង្ហាញខ្លួននៅ Clasico ច្រើនប្រកួតបំផុត ចុងក្រោយនឹងត្រូវបន្សល់ត្រឹមឈ្មោះអ្នកទាំងពីរ នៅតួលេខ ៤៥ ប្រកួតស្មើគ្នា។
បញ្ជាក់ថានៅប្រកួតចុងសប្ដាហ៍នេះ ប្រសិនណាក្នុងចំណោមក្រុមទាំងពីរមានមួយទទួលបានជ័យជម្នះ ឬយកបាន ៣ ពិន្ទុ នោះតារាងចំណាត់ថ្នាក់នៅ La Liga ក៏នឹងមានការប្រែប្រួល។ ជាងនេះក្នុងករណីដែល Barcelona ឈ្នះ ហើយ Atletico បានត្រឹមស្មើ ឬចាញ់ Real Betis នោះអ្នកមានបុណ្យនឹងត្រលប់មកឈរនៅកំពូលតារាង ក្រោយខកខានអស់រយៈពេលជាង ២ ខែ៕