គិត​មក​ទល់​ថ្ងៃ​នេះ ម៉ោង​នេះ ១២ ក្នុង​ចំណោម​កៅអី​ទាំង ១៦ ត្រូវ​បាន​កក់​ទុក​រួចរាល់ ដ្បិត​បើ​សេសសល់​ប្រកួត​មួយ​ជុំ​ទៀត​ក្នុង​ដៃ សម្រាប់​ការ​បិទ​បញ្ចប់​វគ្គ​ចែក​ពូល។ នៅ​អេស្ប៉ាញ ៤ ក្លឹប​ហើយ​ឆ្លង​ផុត តួ​យ៉ាង​គឺ Real Madrid, Barcelona, Atletico Madrid និង Real Sociedad ស្រប​ពេល​នៅ​អាល្លឺម៉ង់ ៣ ក្លឹប​បណ្តែត​ឈ្មោះ​ឡើង គឺ Bayern Munich, Borussia Dortmund និង RB Leipzig ហើយ​នៅ​អង់គ្លេស​ទើប​តែ​បន្ថែម​ឈ្មោះ Arsenal បន្ទាប់​ Man City កក់​តាំង​ជុំ​មុន ដូច​គ្នា​នឹង​អ៊ីតាលី ២ ក្លឹប​បាន​ឆ្លង គឺ Inter Milan និង Lazio ហើយ​នៅ​ហូឡង់ ក៏​កាត់កង​យក​បាន​មួយ​ដែរ​ជា PSV។

       ៤ កៅអី​សេសសល់ អ្នក​គាំទ្រ​កំពុង​ទន្ទឹង​រង់ចាំ ចង់​អ៊ុត​ចង់​ដឹង​ចម្លើយ តើ​មាន​បិសាច​ក្រហម Manchester United ដែរ​ឬ​ទេ ខណៈ​រដូវ​កាល ២០២៣/២៤ ក្លឹប​ដឹកនាំ​ដោយ​អ្នកចាត់ការ​លោក Erik ten Hag ហាក់​កាន់​តែ​យ៉ាប់យ៉ឺន​ខ្លាំង នេះ​ទោះ​ស៊ុត​ចូល​គេ​ច្រើន​គ្រាន់ តែ​របូត​ក៏​ច្រើន​គ្រាប់​ដែរ។ CTS SPORTS ​បង្ហាញ​រឿងរ៉ាវ​គួរ​ឲ្យ​ចាប់​អារម្មណ៍​មួយ​ចំនួន​អំពី​កូន​ដំរី​តូច Arsenal និង​បិសាច​ក្រហម Man United៖

       ពាក់ព័ន្ធ​នឹង​កាំភ្លើង​ធំ Arsenal ដឹកនាំ​ដោយ​អ្នកចាត់ការ​លោក Mikel Arteta ស្ថិត​ក្នុង​ពូល B គិត​ត្រឹម​ប្រកួត​ទី ៥ ឈ្នះ ៤ ស្មើ ០ ចាញ់ ១ មាន ១២ ពិន្ទុ​នាំ​មុខ​គេ។ ជ័យជម្នះ​ដ៏​គួរ​ឲ្យ​ភ្ញាក់ផ្អើល​ចុងក្រោយ គឺ​ការ​បំបាក់​ក្លឹប​ភ្ញៀវ​បារាំង​ស្ពឹក​មុខ ៦-០ នៅ​ឯ​កីឡដ្ឋាន Emirate Stadium ក្នុង​ទឹកដី​ចក្រភព​អង់គ្លេស។

       កំណត់ត្រា​ខ្នាត​យក្ស ២ Arsenal បាន​សាង​នៅ​យប់មិញ​នេះ គឺ​ក្លាយ​ជា​ការ​ឈ្នះ​ធំ​បង្អស់​ឥត​ធ្លាប់​មាន ដែល​ក្លឹប​អង់គ្លេស​ប្រកួត​ទល់​ក្លឹប​បារាំង នៅ​ពាន​រង្វាន់​អឺរ៉ុប ខណៈ​មួយ​ផ្សេង​ទៀត ពួក​គេ​ក៏​ជា​ក្លឹប​អង់គ្លេស​ដំបូង ដែល​អាច​រក​បាន ៥ គ្រាប់​ត្រឹម​តង់​ទី​មួយ នៅ​ប្រវត្តិសាស្រ្ត Champions League។ ហ្នឹង​ហើយ​នាទី ១៣ ដោយ Kai Havertz នាទី​ ២១ ដោយ Gabriel Jesus នាទី​ ២៣ ដោយ Bukayo Saka នាទី ២៧ ដោយ Gabriel Martinelli និង ៤៥+១ ដោយ Martin Odegaard មុន​ចែក​ឲ្យ Jorginho ​នាទី ៨៦ ជា​ការ​ស៊ុត​ប៉េណាល់ទី មុន​បិទ​តង់។

ពាក្យ​ថា ឡើង​ទ្រើង គឺ​ដំរី​ក្រហម​បោរ​លឿន​ឆ្ពោះ​ទៅ​មុខ លើ​គេ​ទាំង​ពាន​ក្នុង​ស្រុក​និង​ពាន​អឺរ៉ុប។ ត្រង់ Premier League ​ចុះ​ឡើង Arsenal ក៏​រំកិល​មក​ឈរ​កំពូល​តារាង​ជា​ថ្មី គិត​ត្រឹម​ជុំ​ទី ១៣ មាន ៣០ ពិន្ទុ​ពី​លើ Man City ១ ពិន្ទុ។

ឥឡូវ​យើង​ងាក​មក​និយាយ​ដើម Man United វិញ​ម្តង ចំណុច​ធំ​បង្អស់ គឺ​បកស្រាយ​ចម្ងល់​អ្នក​គាំទ្រ​ជា​មុន​ ថា​តើ​ក្លឹប​ម្ចាស់ដី Old Trafford ត្រូវ​ការ​សេណារីយ៉ូ​បែប​ណា ទើប​អាច​ឲ្យ​ពួក​គេ​ឆ្លង​ទៅ​វគ្គ ១៦ ក្រុម UCL បាន?

       មិន​ពិបាក​គិត​ច្រើន​សារ​នេះ ៥ ប្រកួត ៤ ពិន្ទុ​របស់ United សម្រេច​ឲ្យ​ពួក​គេ​ត្រូវ​ការ​យក​ឈ្នះ​ទៅ​លើ Bayern Munich ឥត​អាច​ខក​បាន​នៅ​ល្បាក់​ពាក់​កណ្តាល​ខែ​ធ្នូ​ខាង​មុខ ហើយ​ចំ​ថ្ងៃ​នោះ​ដែរ Copenhagen ទល់ Galatasaray គូ​នេះ​ត្រូវ​តែ​ស្មើ បើ​មាន​ម្ខាង​ណា​ឈ្នះ នោះ​ជ័យជម្នះ​របស់ United ក៏​មិន​គ្រប់គ្រាន់​ឲ្យ​ពួក​គេ​ទទួល​បាន​កៅអី​ទៅ​វគ្គ​បន្ទាប់​ដែរ។

តែ​ក្នុង​លក្ខខណ្ឌ United ឈ្នះ Bayern ហើយ​មួយ​រវាង Copenhagen ឬ Galatasaray ចាញ់ ម្ល៉េះ​ក្លឹប​អង់គ្លេស ក៏​សល់​ឱកាស​ចុងក្រោយ ធ្លាក់​ទៅ​វគ្គ​ចែក​ពូល ពាន Europa League ជា​ជាង​ឥត​បាន​លេង​អ្វី​ទាំង​អស់។

បញ្ហា​នៅ​តែ​ជា​បញ្ហា ដែល​មិន​អាច​រក​ឃើញ​ចម្លើយ ខ្លះ​ទៅ​បន្ទោស​តំបន់​ប្រយុទ្ធ ខ្លះ​ថា​មក​ពី​បម្រើ ខ្លះ​ទៀត​ក៏​ថា​មក​ពី​ការពារ។ យ៉ាង​ណា​ខណៈ​ចុងក្រោយ អ្នកចាំទី Andre Onana ហាក់​ត្រូវ​មាត់​ខ្លាំង​ពី​អ្នក​គាំទ្រ ចុះ​សម្រាប់​យោបល់​អ្នក​រាល់​គ្នា អ្វី​ទៅ​ជា​ចំណុច​ក្លឹប​បិសាច​ក្រហម​គួរ​កែប្រែ​ពេល​ខាង​មុខ?

ប្រភព៖ បរទេស​