- wolf246@gmail.com
Barcelona បញ្ចប់កំណត់ត្រាខកខានឈ្នះ ១៦ ឆ្នាំ តែក្រុមចាញ់ Cadiz ជាអ្នក Assist ជីវិតអ្នកគាំទ្រ
- Sunday 11 September 2022
- 01:58 PM
លើសពីប្រកួតដើម្បីតែលទ្ធផលគ្រាប់បាល់ ក៏ប៉ុន្តែនៅជំនួបរវាង Cadiz ជាម្ចាស់ផ្ទះ ទល់ក្លឹបភ្ញៀវ Barcelona យប់មិញ បានបន្សល់ទុកនូវហេតុការណ៍ដ៏រន្ធ.ត់ និងទង្វើគួរឲ្យគោរព ដល់ទទួលបានការសាទរយ៉ាងធំធេងពីអ្នកគាំទ្រក្នុងកីឡដ្ឋាន។
អ្នកមានបុណ្យបានយកឈ្នះ ជាមួយលទ្ធផលបញ្ចប់ ៤-០ តែមុននោះ ការប្រកួតត្រូវបានផ្អាកជិតមួយម៉ោង ដោយហេតុការណ៍តក់.ស្លុតបានកើតឡើងនៅនាទី ៨២ កំឡុងពេលក្រុមដឹកនាំដោយលោក Xavi Hernandez បើកការនាំមុខមុនពីរគ្រាប់។ ភ្លាមៗស្រាប់តែមានអ្នកគាំទ្រវ័យចំណាស់ម្នាក់ មិនស្គាល់អត្តសញ្ញាណ បានដួលសន្លប់នៅតំបន់អង្គុយទស្សនា ហើយភាពចលាចលក៏បន្លឺសំឡេងឡើង ដល់កីឡាករលើទីលាន ប្រញាប់ស្រែកប្រាប់បន្តទៅកាន់អាជ្ញាកណ្ដាល ឲ្យផ្អាកការប្រកួត។
ក្នុងកីឡដ្ឋាន Estadio Nuevo Mirandilla ពេលនោះ បានស្ងប់ស្ងាត់មួយរំពេច ដោយមានការសហការដើម្បីជួយសង្គ្រោះអ្នកគាំទ្រ ដែលកំពុងមានអាការៈគាំងបេះដូង ប៉ុន្តែភ្លាមៗមិនមានឧបករណ៍គ្រប់គ្រាន់ក្នុងដៃនោះទេ។ ឃើញបែបនេះ អ្នកចាំទីក្លឹប Cadiz កីឡាករ Jeremias Ledesma ក៏មិនបង្អែបង្អង់យូរ ហើយស្ទុះវឹងរត់ទៅយកប្រអប់សង្គ្រោះបន្ទាន់ Defibrillator ពីជ្រុងម្ខាងទៀតក្នុងកីឡដ្ឋាន ពីក្រុមសង្រ្គោះ ហើយក៏បានរត់យ៉ាងលឿន សំដៅបោះបញ្ជូនប្រអប់នោះ ដោយគ្មានការស្ទាក់ស្ទើរ។
រូបភាពមួយសន្លឹកដែលគេកំពុងចាប់អារម្មណ៍ និងសរសើរបំផុត គឺកន្លែងនេះហើយ ដែលក្រុមគ្រូពេទ្យនៃក្លឹប Barcelona បានបោះប្រអប់សង្រ្គោះបន្ទាន់ ទៅឲ្យ Ledesma ជាអ្នកចាំទីនៃក្លឹបគូប្រជែង Cadiz ហើយបញ្ជូនបន្ត ទៅឲ្យកន្លែងកើតហេតុ ដើម្បីតែគោលដៅរួម នោះគឺជួយជីវិតអ្នកគាំទ្រ ឲ្យឆ្លងផុតពីទ្វារមរ.ណៈ។
វីរបុរសទីពីររបស់ Cadiz គឺជាកីឡាករបម្រុង លេងតំណែងបម្រើ Jose Mari ដែលគេបានប្រញាប់ប្រញាល់ទៅរកប្រង់ការ ហើយលើកសំដៅទៅទីតាំងកើតហេតុ ដើម្បីជួយសម្រួលលើកជនរងគ្រោះបញ្ជូនទៅកាន់មន្ទីរពេទ្យ។
🏥⛑️ José Mari, jugador del @Cadiz_CF, ayuda a un personal sanitario a llevar una camilla a la grada para desalojar al aficionado que presenta problemas de salud en la grada del #CádizBarça
— Carrusel Deportivo (@carrusel) September 10, 2022
📹 Vía @AdriaAlbets pic.twitter.com/k4x7A420Ay
សភាពការណ៍មិនទាន់ត្រូវបានដោះស្រាយ ១០០ ភាគរយនោះទេ ដោយកីឡាករជាច្រើន បានឱនក្បាលចុះ បន់ស្រន់ទាំងទឹកមុខភិតភ័យ ហើយក្រោយមកក៏អាជ្ញាកណ្ដាលសម្រេចឲ្យអ្នករាល់គ្នាលើទីលានទាំងអស់ ដើរចូលទៅក្នុងបន្ទប់ផ្លាស់សំលៀកបំពាក់ ជាហេតុនាំឲ្យការប្រកួតត្រូវផ្អាកអស់ពេលជិត ១ ម៉ោង។
បើតាមការលើកឡើងពីប្រធានក្លឹប Cadiz លោក Manuel Vizcaino បញ្ជាក់ថា តាមពិតទៅមិនមែនតែម្នាក់ទេ ក្រោយតែករណីបុរសជួបបញ្ហាបេះដូង ប៉ុន្មាននាទីក្រោយ ក៏មានអ្នកកាន់កាមេរ៉ាមួយរូបទៀតដួលសន្លប់ព្រមគ្នា តែពួកគេត្រូវបានក្រុមសង្គ្រោះជួយយ៉ាងសស្រាក់សស្រាំ ហើយឥឡូវនេះ ក៏បានជាសះស្បើយ ត្រលប់មកសភាពធម្មតាវិញដែរ។
ងាកទៅលោក Xavi Hernandez ក៏និយាយដែរថា៖ “ជីវិតមនុស្សគឺសំខាន់ជាងអ្វីៗទាំងអស់ វាសំខាន់ជាងការប្រកួត ហើយបើមានរឿងអកុ.សលអ្វីកើតឡើង ពិតណាស់ត្រូវតែផ្អាកការប្រកួតជាបន្ទាន់”។ គួររំឭកថា ជ័យជម្នះយប់មិញរបស់ Barcelona គឺជាការបញ្ចប់កំណត់ត្រាមិនស្គាល់ពាក្យថា ឈ្នះ ខកខានកើតមានតាំងពីឆ្នាំ ២០០៦។ ជួបគ្នា ៤ លើកកន្លងមក Cadiz យកឈ្នះ ២ ស្មើ ២ មុន Barca អាចសាងជ័យជម្នះជាថ្មី នៅឆ្នាំ ២០២២ នេះ៕
ប្រភព៖ បរទេស