- wolf246@gmail.com
ប្រធាន FIFA លោក Gianni Infantino អំពាវនាវឱ្យរុស្ស៊ី និងអ៊ុយក្រែនមានបទឈប់បាញ់រយៈពេលមួយខែដើម្បី World Cup
- Wednesday 16 November 2022
- 01:48 PM
ប្រធាន FIFA លោក Gianni Infantino បានអង្វរសុំឱ្យមានបទឈប់បាញ់រយៈពេលមួយខែក្នុងប្រទេសអ៊ុយក្រែនក្នុងអំឡុងពេលប្រកួត World Cup ដោយសារតែប្រទេសទាំងអស់លើពិភពលោករួបរួមគ្នាលេងកីឡា World Cup ។
នៅពេលនិយាយជាមួយមេដឹកនាំពិភពលោកនៅក្នុងប្រទេសឥណ្ឌូនេស៊ីក្នុងអំឡុងកិច្ចប្រជុំកំពូល G20 លោក Infantino បាននិយាយថាការប្រកួតបាល់ទាត់ពិភពលោកអាចដើរតួជាវេទិកាមួយដើម្បីបញ្ចប់ជម្លោះ ។
គាត់បាននិយាយថា៖
“យើងដឹងថាការផ្តោតសំខាន់របស់យើងក្នុងនាមស្ថាប័នកីឡាគឺ និងគួរតែជាកីឡា ប៉ុន្តែដោយសារតែបាល់ទាត់បង្រួបបង្រួមពិភពលោក ជាពិសេស FIFA World Cup នេះដែលមានមនុស្សចំនួន៥ពាន់លាននាក់មើលវា អាចជាកត្តាជំរុញឱ្យមានកាយវិការវិជ្ជមាន សម្រាប់សញ្ញា ឬ សារនៃក្តីសង្ឃឹមបញ្ចប់សង្រ្គាម” ។
គាត់បាននិយាយថាគាត់ប្រាថ្នាឱ្យមាន “បទឈប់បាញ់បណ្តោះអាសន្ន” សម្រាប់រយៈពេលនៃ FIFA World Cup ឬយ៉ាងហោចណាស់ ‘ការអនុវត្តច្រករបៀងមនុស្សធម៌’” ។
លោក Infantino បន្ថែមថា “អ្នកគឺជាអ្នកដឹកនាំពិភពលោក។ អ្នកមានសមត្ថភាពក្នុងការជះឥទ្ធិពលលើដំណើរនៃប្រវត្តិសាស្ត្រ” ។
“បាល់ទាត់ និង FIFA World Cup កំពុងផ្តល់ជូនអ្នក និងពិភពលោកនូវវេទិកាតែមួយគត់នៃការរួបរួម និងសន្តិភាពនៅទូទាំងពិភពលោក” ។
“ដូច្នេះសូមឆ្លៀតឱកាសនេះដើម្បីធ្វើអ្វីគ្រប់យ៉ាងដែលយើងអាចធ្វើបានដើម្បីចាប់ផ្តើមបញ្ចប់ជម្លោះទាំងអស់” ៕
ប្រភព៖ Sportbible