- wolf246@gmail.com
ប្រវត្តិសាស្ត្រក៏ចារជូនជាតិ ក្តីស្រមៃក៏រៀបឲ្យក្លាយជាការពិត មួយរាត្រី ៣ រឿង Kvaratskhelia ចាំមួយជីវិត
- Thursday 27 June 2024
- 07:45 PM
ព្រឹត្តិការណ៍ EURO 2024 បានឈានមកដល់វគ្គ ១៦ ក្រុមជាផ្លូវការ ហើយនៅជុំជម្រុះក្នុងពូលថ្ងៃចុងក្រោយ យើងចាប់អារម្មណ៍លទ្ធផលភ្ញាក់ផ្អើលត្រង់ជម្រើសជាតិឈរលេខ ៧៤ នៅ FIFA Ranking គឺហ្សកហ្ស៊ីបែរអាចយកឈ្នះគីឡូយក្សបញ្ចខែលក្រហមព័រទុយហ្គាល់ឈរលេខ ៦ លំដាប់សកលលោក ក្នុងលទ្ធផល ២-០។
ទន្ទឹមនឹងជ័យជម្នះនេះដែរ ក៏បាននាំឲ្យមានរឿងគួរឲ្យចាប់អារម្មណ៍ ៣ ផ្តោតជាពិសេសលើតារាឆ្នើមប្រចាំប្រទេស Khvicha Kvaratskelia ដែលគេក៏ជាអ្នករកបានគ្រាប់បាល់ ហើយរាប់បានជាតួឯកសំខាន់នៅទំព័រក្របមុខសារព័ត៌មាន៖
៣) សម្រេចក្តីស្រមៃខ្លួនឯង
ខ្សែប្រយុទ្ធវ័យ ២៣ ឆ្នាំ គេធ្លាប់បានប្រកាសឥតលាក់បាំងថាជាអ្នកគាំទ្រតារាឆ្នើមចាស់វស្សា Cristiano Ronaldo ដោយមានទាំងរូបភាពកាលនៅក្មេង ធ្លាប់ប្រជ្រៀតគ្នាទៅបានថតរូបគាំទ្រ Legend ក្នុងដួងចិត្ត។ ទោះយ៉ាងណាមុនការប្រកួត អ្នកជំនាញបញ្ចប់ទីជូនហ្សកហ្ស៊ីក៏បានប្រាប់អ្នកសារព័ត៌មានផងដែរ៖ “ខ្ញុំប្រាថ្នាចង់ទទួលបានអាវរបស់ Ronaldo នៅចប់ការប្រកួត” [ពោលដោយមិនខ្វល់លទ្ធផលឈ្នះចាញ់បែបណាឡើយ]។
ដល់ហើយការពិត បានកើតដូចការគិត អ្វីដែលស្រមៃទុកក្នុងចិត្តវាអាចទៅរួចមែន ដោយ Kvaratskhelia នៅការជាប់ជម្រើសដំបូង គេទទួលបានឱកាសចាប់ដៃផ្តល់ជូនស្នាមញញឹមចេញពីស្តេចពពែព័រទុយហ្គាល់ មិនត្រឹមតែប៉ុណ្ណោះ បញ្ចប់ការប្រកួតទោះ CR7 ខឹងច្រឡោតចំពោះចំណាត់ការអាជ្ញាកណ្ដាល ក៏សម្រាប់កីឡាករហ្សកហ្ស៊ីជាគូប្រជែង នៅតែទទួលបានអាវលេខ ៧ មកទុកនៅនឹងខ្លួនដូចការគ្រោងទុក។
២) ឈ្នះពានកីឡាករល្អបំផុតប្រចាំការប្រកួត
ឈរជើង ៨២ នាទីលើទីលាន រកបានមួយគ្រាប់តាំងបើកឆាកក្រោយ ៩២ វិនាទីផ្តើមការប្រកួត ហើយគេបញ្ជូនបាល់ ៩ លើក អត្រាជោគជ័យ ១០០ ភាគរយ ស៊ុតចេញពីជើង ៣ លើក បណ្តើរបាល់ជោគជ័យ ២ លើក ឆក់យកបាល់ក្រោមជោគជ័យ ៨/១២ លើក ស្ថិតិអស់នេះ ក៏រុញឲ្យ ប្រយុទ្ធស្លាបក្លឹប Napoli ឈ្នះពាននាមកីឡាករល្អបំផុតប្រចាំការប្រកួត ឬហៅកាត់ POTM។ បញ្ជាក់ ពានឯកត្តជននេះ វាធំនិងមានន័យខ្លាំង សឹងតែធំជាងពាន MOTM របស់ UCL ទៅទៀត ព្រោះ ៤ ឆ្នាំទើបលេងម្តង។
១) ហ្សកហ្ស៊ីកត់ត្រាប្រវត្តិសាស្ត្រថ្មី
នេះជាការបង្ហាញខ្លួនលើកដំបូងរបស់ពួកគេនៅពានរង្វាន់អឺរ៉ុប EURO ដែលមានអាយុកាល ៦៦ ឆ្នាំ។ នៅវត្តមានដំបូងនេះដែរ ហ្សកហ្ស៊ីហាក់មិនធ្វើឲ្យអ្នកគាំទ្រខកចិត្តឡើយ ដោយបានបន្ថែមសមិទ្ធផលថ្មីផ្សេងទៀត រំកិលឈ្មោះចូលដល់វគ្គ ១៦ ក្រុមចុងក្រោយ ត្រូវប៉ះគីឡូធ្ងន់ គឺគោជល់អេស្ប៉ាញ។
អាចថាពួកគេទំនងត្រូវធ្វើការងារធ្ងន់បន្តិច ដ្បិតជម្រើសជាតិដែលជាគូប្រជែងខាងលើនោះ ក្នុងពូលកន្លងទៅ រាប់ជាក្រុមតែមួយគត់ លេងឈ្នះទាំង ៣ ប្រកួតឥតស្គាល់ចាញ់ឬស្មើ។ កាលបរិច្ឆេទនឹងធ្វើឡើងនៅវេលាម៉ោង ០២:០០ នាទីទៀបភ្លឺ ឈានចូលថ្ងៃចន្ទ ទី ១ កក្កដា មានផ្សាយបន្តផ្ទាល់លើ តេលេក្រាម CTS SPORTS បែបពេញអេក្រង់ រណ្តំដោយសម្លេង MC អធិប្បាយពីរោះជក់ចិត្ត មិនធុញមិនថប់ងងុយគេង៕
ប្រភព៖ បរទេស