ទីផ្សារ​ដោះដូរ​រដូវ​រងា សម្រាប់​ខែ​មករា គឺ​សេសសល់​ពេលវេលា​តែ ៨ ​ថ្ងៃ​ទៀត​ប៉ុណ្ណោះ ខណៈ​ពេល​នេះ​ក្លឹប​ជា​ច្រើន​ក៏​កំពុង​សកម្ម​ខ្លាំង មិន​ថា​តែ​ការ​នាំ​ចូល និង​ការ​ប្រាកដ​នៅ​ការ​លក់​ចេញ​កីឡាករ​ដែល​ស្ថិត​ក្រៅ​ជម្រើស។

បង្វែរ​ទៅ​មើល​ក្លឹប Real Madrid និង Juventus ​នៅ​ថ្ងៃ​អាទិត្យ​នេះ យើង​ទទួល​បាន​ដំណឹង​ផ្លូវការ​ព្រម​គ្នា តែ​មួយ​ពាក់ព័ន្ធ​នឹង​កីឡាករ​ត្រូវ​ចាកចេញ និង​មួយ​ផ្សេង​ទៀត អំពី​កីឡាករ​ដែល​នឹង​បន្ត​នៅ ១០០ ភាគរយ។

១) ការ​ចាកចេញ​របស់ Aaron Ramsey

បើ​តាម​ការ​លើក​ឡើង​ពី​អ្នកចាត់ការ​ក្លឹប​សេះ​បង្កង់ លោក Massimiliano Allegri បាន​បញ្ជាក់​នៅ​សន្និសីទ​សារព័ត៌មាន​បែប​នេះ​ថា៖ “Ramsey គេ​នឹង​មិន​ស្ថិត​ក្នុង​ក្រុម​របស់​យើង​ត​ទៅ​ទៀត​ទេ ដោយ​គេ​នឹង​ត្រូវ​ចាកចេញ​ហើយ​នៅ​ពេល​ខាង​មុខ”។

បញ្ជាក់​ឲ្យ​ដឹង សុពលភាព​កុងត្រា​កីឡាករ​សញ្ជាតិ​វែល តាម​ថា​ត្រូវ​ផុត​នៅ​ចុង​ខែ​មិថុនា ឆ្នាំ ២០២៣ ​ឯ​ណោះ តែ​ទំនង​ជា​ក្លឹប​អស់​ការ​អត់ធ្មត់​ជាមួយ​នឹង​បន្ទុក​ចំណាយ​ថ្លៃ​ពលកម្ម​ដ៏​ក្រាស់ក្រែល គួប​ផ្សំ​នឹង​ការ​លេង​របស់​កីឡាករ​មិន​ជា​ល្អ​ផង ដូច្នេះ​ការ​បែក គឺ​ជា​ជម្រើស​ដ៏​ត្រឹមត្រូវ។

មិន​ច្បាស់​ថា Ramsey នឹង​ផ្ទេរ​ទៅ​ក្លឹប​ថ្មី​ណា​មួយ​ទេ តែ​តាម​ចចាមអារ៉ាម​ពី​សព្វ​មួយ​ដង គឺ​អាច​ជា​ក្លឹប Everton, Newcastle United ឬ West Ham United។ រំឭក​ថា​កីឡាករ​វ័យ ៣១ ឆ្នាំ បង្ហាញ​ខ្លួន​សរុប​ឲ្យ​ Juventus ៧០ ប្រកួត រក​បាន ៦ គ្រាប់​និង Assist ៦ លើក។ ប្រាក់​ពលកម្ម​របស់​ខ្សែ​បម្រើ​ខាង​លើ នៅ​ក្លឹប​អ៊ីតាលី ទទួល​បាន​ដល់​ទៅ ៤០០ ០០០ ផោន​ឯ​ណោះ​ក្នុង​មួយ​សប្តាហ៍។

២) Eden Hazard បន្ត​ស្ថិត​ក្នុង​ផែនការណ៍​របស់​លោក Ancelotti

បន្ទាប់​ពី​មាន​ចចាមអារ៉ាម​ថា​ក្លឹប​តោ​ខៀវ Chelsea និង Newcastle United កំពុង​តាម​ឃ្លាំ​មើល ចង់​យក​កីឡាករ​បែលហ្សិក ត្រលប់​ទៅ Premier League វិញ ក៏​ស្រាប់​តែ​អ្នកចាត់ការ​ក្លឹប​អាណាព្យាបាល Real Madrid លោក Carlo Ancelotti ចេញ​មក​អះអាង​ភ្លាម ថា​ខ្សែ​ប្រយុទ្ធ​វ័យ ៣១ ឆ្នាំ​របស់​ខ្លួន នឹង​មិន​ចាកចេញ​ទៅ​ណា​នោះ​ទេ។

បញ្ជាក់​ឲ្យ​ដឹង​ កីឡាករ​លេង​តំណែង​ប្រយុទ្ធ​ស្លាប​ នៅ​រដូវ​កាល​នេះ ជាមួយ​ស្តេច​ស Madrid ទើប​តែ​រក​បាន ១ គ្រាប់​និង Assist ២ លើក នៅ​ការ​បង្ហាញ​ខ្លួន​សរុប ១៧ ប្រកួត។ សុពលភាព​កុងត្រា​របស់ Hazard សេសសល់​ដល់​ចុង​ខែ​មិថុនា ឆ្នាំ ២០៤។

តែ​យ៉ាង​ណា​តាម​ការ​បញ្ជាក់​ Ancelotti បាន​លើក​ឡើង​ច្បាស់ៗ​ថា៖ “Hazard គេ​នឹង​បន្ត​ស្ថិត​ក្នុង​ផែនការណ៍​របស់​ Real Madrid នៅ​រដូវ​កាល​បន្ទាប់ ២០២២/២៣ រឿង​នេះ​គឺ​ខ្ញុំ​សូម​បញ្ជាក់​ឲ្យ​បាន​ច្បាស់”។

តាម​ពិត​ទៅ​បើ អធិរាជ​ស គិត​ចង់​លក់​ចេញ Hazard ពេល​នេះ ក៏​នឹង​ខាត​ធ្ងន់ធ្ងរ​ដែរ ព្រោះ​ដោយសារ​ទម្រង់​លេង​គេ​ធ្លាក់​ចុះ អ៊ីចឹង​តម្លៃ​ផ្ទេរ​អាច​បាន​ត្រឹម ៣៥ លាន​អឺរ៉ូ​ប៉ុណ្ណោះ។ ទំហំ​នេះ គឺ​ខាត​ ១ ទ្វេ​ជា ៣ ធៀប​នឹង​តម្លៃ​ដើម។ ចាប់​តាំង​ការ​ផ្ទេរ​មក​ចូលរួម​នៅ​រដូវ​ក្តៅ ឆ្នាំ ២០១៩ Hazard រក​បាន​តែ ៦ គ្រាប់​និង Assist ១០ លើក​ប៉ុណ្ណោះ នៅ​ការ​បង្ហាញ​ខ្លួន​សរុប ៦០ ប្រកួត៕

ប្រភព៖ Sportsmole