តាំង​ពី​ព្រលប់​ដល់​ស្មើ​នេះ បើ​និយាយ​ពី​ប្រធានបទ​ក្នុង​ពិភព​បាល់ទាត់​អន្តរជាតិ គឺ​លើក​មក​ចែករំលែក​អត់​អស់​ទេ ​ក៏​ព្រោះ​តែ​បណ្តុំ Legend ចាស់​ថ្មី ក្រឡុក​ផ្អើល​អស់​ដី​អាស៊ី អឺរ៉ុប និង​អាមេរិក​ខាង​ជើង ខ្លះ​ដល់​កើត​កំណត់ត្រា​ចារ​ជា​ប្រវត្តិសាស្រ្ត​ឥត​ធ្លាប់​មាន​ទៀត​ផង។ យ៉ាង​ណា​ជៀសវាង​បងប្អូន​យើង​ខ្លះ តាម​មិន​ទាន់ ក៏ CTS SPORTS សម្រេច​ធ្វើ​ការ​សង្ខេប​ចែករំលែក​ពាក់ព័ន្ធ​រឿង​រសើប​៤ នៅ​រយៈ​ពេល ២៤ ម៉ោង​ចុងក្រោយ​ជូន​ឲ្យ​អ្នក​រាល់​គ្នា​បាន​ដឹង៖

៤) Ronaldo បន្ត​ឆ្ពោះ​ទៅ​គោលដៅ​ទី ១ ពាន់

អ្នក​ខ្លះ​គេ​ចាស់ ថយ​គុណភាព ធៀប​អី​ខុស​តែ​ CR7 កាន់​តែ​ចាស់ កាន់​តែ​ហឹរ ដូច​គេ​ថា​មែន។ នេះ​តួ​លេខ​គ្រាប់​បាល់​កើន​ឡើង​ខ្ពស់​ជា​លំដាប់ ជាក់ស្តែង​ជ័យជម្នះ​របស់ Al Nassr ៦-០ ទៅ​លើ Al-Wehda ក្នុង​ក្របខ័ណ្ឌ​កំពូល​អារ៉ាប៊ីសាអូឌីត​កាល​ពី​យប់មិញ គឺ Ronaldo បញ្ចប់​ទី​រក​បាន Hat-trick ខណៈ​បី​គ្រាប់​ទៀត​ធ្វើ​បាន​ដោយ​មិត្ត​រួម​ទ្រនំ Otavio, Sadio Mane និង Mohammed Al-Fatil។

ការ​បន្ថែម ៣ គ្រាប់​វា​ក៏​បន្ត​តួ​លេខ​ទី ៦៦ ​នាម​កីឡាករ​អាជីព​កំពុង​ឈរ​ជើង​មាន Hat-trick ច្រើន​ដាច់​គេ​បង្អស់ ហើយ​ជា​រួម​ក្នុង​អាជីព​របស់​តារា​ចាស់​វស្សា​វ័យ ៣៩ ឆ្នាំ​ខាង​លើ វា​រាប់​ជា​គ្រាប់​បាល់​ទី ៨៩០ ហើយ ពោល​នៅ​ខ្វះ​តែ ១១០ គ្រាប់​ទៀត​ប៉ុណ្ណោះ នឹង​ឈាន​ដល់​គោលដៅ​ធំ​មហាសាល គឺ​គ្រាប់​បាល់​ផ្លូវការ​ទី ១០០០ មិន​ទាន់​មាន​អ្នក​យក​បាន។

ជាង​នេះ​ក៏​មាន​កំណត់ត្រា​ខ្នាត​យក្ស​មួយ​ទៀត​កំពុង​រង់ចាំ​ខ្សែ​ប្រយុទ្ធ​ព័រទុយហ្គាល់​ខាង​លើ​ផង​ដែរ នោះ​គឺ​នាម​អ្នក​រក​បាន​គ្រាប់​បាល់​ច្រើន​បំផុត​នា​រដូវ​កាល​ទោល SPL ដែល​សព្វថ្ងៃ​គ្រោង​ដោយ​ឈ្មោះ​កីឡាករ​ម៉ារ៉ុក Abderrazak Hamdallah រក​បាន ៣៤ គ្រាប់ សម្រេច​ថា Ronaldo កំពុង​មាន ៣២ គ្រាប់ ត្រូវ​ការ​តែ ៣ ជើង​ចូល​ទី​ទៀត​ប៉ុណ្ណោះ ដ្បិត​ប្រកួត​ក្នុង​ដៃ​សេសសល់​ដល់​ទៅ ៤។

៣) Haaland នាំ​មុខ​ដាច់​ការ​ប្រជែង​ពាន​ស្បែក​ជើង​មាស

២៥ គ្រាប់​បណ្តោះអាសន្ន សម្រាប់​ម៉ាស៊ីន​ស៊ុត​របស់ Man City បន្ទាប់​តែ​យប់មិញ​ទល់​ចចក Wolves គេ​រក​បាន ៤ គ្រាប់​ម្នាក់​ឯង កក្រើក​បាល់ទាត់​អឺរ៉ុប។ ខណៈ​នេះ Haaland នាំ​មុខ​ឆ្ងាយ​ពី​លើ Cole Palmer និង Alexander Isak មាន ២០ គ្រាប់ នៅ​ការ​ប្រជែង​ពាន​ស្បែក​ជើង​មាស​ប្រចាំ​រដូវ​កាល Premier League។

ដោយឡែក​និយាយ​ដល់​គ្រាប់​បាល់ Hat-trick ត្រឹម​ការ​ចាយ​ពេល​ ២ រដូវ​កាល​នៅ Premier League គេ​រក​បាន​ដល់​ទៅ ៦ លើក វា​ស្មើ​នឹង​កំណត់ត្រា​ Luis Suarez តែ​នៅ​ពី​ក្រោយ​ឈ្មោះ Wayne Rooney មាន ៧ លើក, Harry Kane/Thierry Henry មាន ៨ លើក, Robbie Fowler មាន ៩ លើក និង Sergio Aguero មាន ១២ លើក សុទ្ធ​សឹង​អ្នក​ចាយ​ពេល​រាប់​ឆ្នាំ។

២) កំណត់ត្រា​មិត្តភ័ក្ដិ​បង្កើត Messi&Suarez

៦-២ របស់ Inter Miami ទៅ​លើ New York Red Bulls នៅ​ព្រឹក​ថ្ងៃ​អាទិត្យ ក៏​គួរ​តែ​អរគុណ​ជា​ពិសេស​ដល់​ចំណែក​ធំ​របស់ Lionel Messi និង Luis Suarez។ ដៃ​គូ​ដៃ​កង់​រួម​ឧបទ្វីប​ឡាទីន​តែ​មួយ ម្នាក់​រាប់​ជា​ស្តេច​ Assist ម្នាក់​រាប់​ជា​ស្តេច​ស៊ុត​ក្នុង​ប្រកួត​នោះ។

កីឡាករ​អាហ្សង់ទីន Messi បាន​ក្លាយ​ជា​អ្នក​ Assists ច្រើន​បំផុត​ដល់​ទៅ ៥ ក្នុង​ប្រកួត​ទោល ​ឥត​ធ្លាប់​មាន​នៅ​ប្រវត្តិសាស្រ្ត​ក្របខ័ណ្ឌ​កំពូល​អាមេរិក រី​ឯ​ប្រយុទ្ធ​អ៊ុយរុយហ្គាយ Suarez បាន​សម្ភោធ​គ្រាប់​បាល់​ Hat-trick របស់​គេ​ជា​លើក​ដំបូង​នៅ​ទី​នោះ។

១) Real Madrid ​ក្លាយ​ជា​ម្ចាស់​ពាន La Liga ២០២៣/២៤

ដំបូង​ឈ្នះ Cadiz ៣-០ រក​បាន​ដោយ Brahim Diaz, Jude Bellingham និង Joselu ថា​រង់ចាំ​អ៊ុត​មើល​ប្រកួត​ក្រោយ​ទល់ Granada បើ​ឈ្នះ​គឺ​លើក​ពាន​ស្វ័យប្រវត្តិ តែ​មាន​ឯ​ណា​អត់​ចាំ​យូរ ត្រង់​បរាជ័យ​របស់ Barcelona ២-៤ ក្រោម​ថ្វី​ជើង Granada ក៏​សម្រេច​ឲ្យ​ការ​នាំ​មុខ​ដាច់ ១៣ ពិន្ទុ​របស់​អធិរាជ​ស កំណត់​បាន​ ពួក​គេ​ក្លាយ​ជា​ម្ចាស់​ពាន La Liga ត្រឹម​ជុំ​ទី ៣៤ នេះ​តែ​ម្តង។ បញ្ជាក់​នេះ ជា​ការ​ឈ្នះ​ពាន​លីគ​កំពូល​អេស្ប៉ាញ​លើក​ទី ៣៦ ហើយ ​ខណៈ​ភារកិច្ច​សេសសល់​គឺ​ការ​ប្រកួត​ទល់ Bayern Munich នៅ​វគ្គ ៤ ក្រុម​ចុងក្រោយ Champions League ​ពាក់​កណ្តាល​សប្តាហ៍​បន្ទាប់៕

ប្រភព៖ បរទេស