បងប្អូន​អ្នក​ស្នេហា​វិស័យ​កីឡា​បាល់ទាត់ កំពុង​ទន្ទឹម​រង់ចាំ​យ៉ាង​តក់ក្រហល់​នូវ​ការ​មក​ដល់​នៃ​ជំនួប​ពិសេស រវាង​ក្លឹប Man United និង Liverpool នៅ​ឯ​កីឡដ្ឋាន Rajamangala Stadium ក្នុង​ទីក្រុង​បាងកក ប្រទេស​ថៃ ដែល​ត្រូវ​ធ្វើ​ឡើង នៅ​វេលា​ម៉ោង ០៨:០០ នាទី​យប់ ថ្ងៃ​អង្គារ ទី ១២ ​កក្កដា​ខាង​មុខ។ នេះ​ជា​ប្រកួត​ត្រៀម​បើក​រដូវ​កាល​ដំបូង របស់​ក្រុម​ទាំង​ពីរ តែ​យ៉ាង​ណា​ការ​មក​ដល់​សារ​នេះ ក៏​កំពុង​ធ្វើ​ឲ្យ​អ្នក​គាំទ្រ​មួយ​ចំនួន​មាន​ការ​ខក​ចិត្ត​រួច​ទៅ​ហើយ​ដែរ។

បើ​អ្នក​ជា​អ្នក​គាំទ្រ Cristiano Ronaldo ចង់​ឃើញ​វត្តមាន​មុខមាត់​ពិត​របស់​កីឡាករ​ព័រទុយហ្គាល់ នៅ​ខាង​ក្រៅ​ផ្ទាល់ នោះ​ប្រហែល​ជា​កំពុង​ខកចិត្ត​ធំ​ហើយ ព្រោះ​អី​ក្នុង​បញ្ជី​កីឡាករ​ទាំង ៣១ រូប ដែល​លោក Erik ten Hag ធ្វើ​ការ​កោះហៅ​មក​ចូលរួម ពុំ​ឃើញ​មាន​ឈ្មោះ​តារា​ឆ្នើម​វ័យ ៣៧ ឆ្នាំ​ឡើយ។ Ronaldo ស្ថិត​ក្នុង​ចំណោម​កីឡាករ ៣ រូប ដែល​អវត្តមាន ខណៈ​ ២ រូប​ឯ​ទៀត គឺ Phil Jones និង Brandon Williams។

ក្រៅ​តែ​ពី​នោះ គឺ​សុទ្ធ​តែ​បាន​ចុះចត​ដោយ​សុវត្ថិភាព និង​ទទួល​បាន​ការ​ស្វាគមន៍​យ៉ាង​កក់ក្តៅ ពី​សំណាក់​អ្នក​គាំទ្រ​នៅ​ប៉ែក​អាស៊ីអាគ្នេយ៍ នៅ​ឯ​អាកាសយានដ្ឋាន​អន្តរជាតិ​ដង​មឿង ក្នុង​ទីក្រុង​បាងកក នៅ​ព្រឹក​ថ្ងៃ​ទី ៩ ​កក្កដា​នេះ។

បើ​ទោះ​បី​ពុំ​បាន​ឃើញ Ronaldo តែ​ការ​ចំណាយ​លើ​តម្លៃ​សំបុត្រ ដែល​មាន​តម្លៃ​ចន្លោះ​ពី ១៥០ ទៅ​ជាង ៦០០ ដុល្លារ ក៏​ផ្តល់​ឲ្យ​អ្នក​គាំទ្រ​បិសាច​ក្រហម បាន​ឃើញ​ផ្ទាល់​នូវ​វត្តមាន​កំពូល​កីឡាករ​ឯ​ទៀត​ដូច​ជា​អ្នកចាំទី David de Gea ខ្សែ​ការពារ Harry Maguire, Raphael Varane ខ្សែ​បម្រើ Bruno Fernandes, Scott McTominay ក៏​ដូច​ជា​ចំណូល​ថ្មី Tyrell Malacia និង​ខ្សែ​ប្រយុទ្ធ Marcus Rashford, Jadon Sancho បូក​ផ្សំ​យុវជន Alejandro Garnacho ផង​ដែរ។

បញ្ជាក់​ឲ្យ​ដឹង​ថា បន្ទាប់​ពី​ប្រកួត​ទល់​ក្រុម​លោក Jurgen Klopp បន្ត​ទៅ​ថ្ងៃ​ទី ១៥ United ត្រូវ​ហោះ​ទៅ​ទឹកដី​អូស្ត្រាលី តតាំង​ក្លឹប Melbourne Victory មុន​ការ​វិល​ត្រលប់​មក​ទឹកដី​អង់គ្លេស លេង​ទល់​ក្លឹប Crystal Palace និង Aston Villa ក្នុង​ចំណោម​ប្រកួត​កម្តៅ​សាច់ដុំ​មុន​បើក​រដូវ​កាល។

ងាក​ទៅ​ក្លឹប Liverpool ​ឯ​ណោះ​វិញ តាម​ដំណឹង​ពី​សារព័ត៌មាន GOAL Thailand ចុះ​ផ្សាយ​ថា ពួក​គេ​នឹង​មក​ដល់​នៅ​វេលា​ម៉ោង ១២:០០ រសៀល​ថ្ងៃ​ស្អែក ទី ១០ ​កក្កដា ចុះ​នៅ​អាកាសយានដ្ឋាន​សុវណ្ណភូមិ តែ​វត្តមាន​តារា​ឆ្នើម​សំខាន់ៗ​ដូច​ជា Mohamed Salah និង Alisson មិន​ទាន់​ប្រាកដប្រជា​ ១០០ ភាគរយ​នៅ​ឡើយ ពោល​អាច​ធ្វើ​ដំណើរ​ហោះ​មក​តាម​ក្រោយ តាម​រយៈ​ជើង​ហោះហើរ​ឯកជន នៅ​រសៀល​ថ្ងៃ​តែ​មួយ។

កាល​ពី​ប៉ុន្មាន​ថ្ងៃ​មុន Liverpool បាន​ប្រកាស​បញ្ជី​ឈ្មោះ​អ្នក​ច្បាស់ការ​តែ ១៩ រូប​ប៉ុណ្ណោះ ដោយ​ចំណោម​នោះ កីឡាករ​សំខាន់ៗ​មាន​ដូច​ជា Joel Matip, Jordan Hendereson, Thiago Alcantara, Luis Diaz និង Roberto Firmino ជា​ដើម។ ស្រប​ពេល​ដែល Van Dijk, Salah, Alisson, Jota, Nunez និង Arnold រង់ចាំ​អ៊ុត​មើល​នៅ​ពេល​បន្ទាប់។

កាលវិភាគ​ប្រកួត​របស់​ Liverpool មក​កាន់​ទឹកដី​អាស៊ី មាន​តែ​មួយ​ប៉ុណ្ណោះ គឺ​ទល់ United នៅ​ថ្ងៃ​ទី ១២ ហើយ​រំលង​ ៣ ថ្ងៃ ត្រូវ​ហោះ​ទៅ​ទឹកដី​អឺរ៉ុប​វិញ ប្រកួត​ទល់ Crystal Palace, RB Leipzig, RB Salzburg មុន​ការ​ប្រកួត​សំខាន់ នៃ​ពាន FA Community Shield ទល់ Man City នៅ​ឯ​ចុង​ខែ៕

ប្រភព៖ GOAL Thailand