- wolf246@gmail.com
Pep នៅតែចាត់ទុក Liverpool ជាគូប្រជែងពាននៅរដូវកាលនេះ
- Saturday 15 October 2022
- 01:56 PM
លោក Pep Guardiola នៅតែចាត់ទុកក្រុមហង្សក្រហម Liverpool ជាក្រុមប្រជែងពានខ្លាំងដដែលនៅរដូវកាលនេះ បើទោះជាបច្ចុប្បន្នពួកគេចាញ់ពិន្ទុដល់ទៅ១០ពិន្ទុជាងទៅហើយក្ដី។
ក្រុម Manchester City នឹងត្រូវតតាំងជាមួយក្រុម Liverpool នៅថ្ងៃអាទិត្យស្អែកនេះហើយ ក្នុងពានរង្វាន់ English Premier League ។ ដោយរដូវកាលនេះដែរ ក្រុម City របស់លោក Pep កាន់តែកាចជាងរដូវកាលមុនទៅទៀត បន្ទាប់ពីខ្សែប្រយុទ្ធ Earling Haaland រកគ្រាប់បាល់បានសឹងគ្រប់ប្រកួត និងច្រើនៗគ្រាប់ផង។ ខណៈដែលក្រុម Liverpool វិញ មានទម្រង់លេងមិនល្អនោះទេ ដោយស្ថិតនៅពាក់កណ្ដាលតារាងឯណោះ ព្រោះបញ្ហាកីឡាកររបួសច្រើនពេក។
ត្បិតតែយ៉ាងនេះក្ដី លោក Pep នៅតែមិនមើលស្រាល Liverpool ដដែល ហើយបានចាត់ទុកថាជាក្រុមខ្លាំងមួយអាចប្រជែងពានរង្វាន់បានថែមទៀត។ អ្នកចាត់ការក្រុម Man City បាននិយាយថា៖ “អ្វីដែលខ្ញុំគិតចំពោះ Liverpool គឺគ្មានអ្វីផ្លាស់ប្ដូរទេ។ Liverpool នៅតែជាក្រុមប្រជែងពានរង្វាន់ដដែល។ មិនមានអ្វីអាចកើតឡើងឡើយចំពោះដើមរដូវកាល យើងក៏ធ្លាប់ឆ្លងកាត់វាដូចគ្នា។ វាជារឿងធម្មតាទេក្នុងការប្រកួតប្រជែង ពួកគេនៅតែមានឱកាស នៅតែអាចត្រលប់មកខ្លាំងវិញបាន”៕