ក្លឹប​សេដ្ឋី​បារាំង Paris Saint-Germain ថ្មីៗ​កន្លង​ទៅ​នេះ បាន​ប្រកាស​ចាត់តាំង​អ្នកចាត់ការ​លោក Christophe Galtier ឲ្យ​ចូល​មក​កាន់​តំណែង​ជំនួស​លោក Mauricio Pochettino ដើម្បី​បន្ថែម​លទ្ធភាព​ក្នុង​ការ​ប្រជែង​ពាន​រង្វាន់ UEFA Champions League។ សមិទ្ធផល​ជោគជ័យ​គ្រូ​វ័យ ៥៥ ឆ្នាំ​សម្រេច​បាន កាល​នៅ​ទ្រនំ​ចាស់ OGC Nice គឺ​បាន​ដឹកនាំ​ក្លឹប​ឡើង​ដល់​វគ្គ​ផ្ដាច់ព្រ័ត្រ ពាន Coupe de France ខណៈ​បញ្ចប់​រដូវ​កាល​ចាស់​ឈរ​លេខ ៥ បាន​កៅអី Europa League។

ទោះ​ជា​យ៉ាង​ណា ការ​មក​ដល់​សារ​នេះ Galtier ក៏​ទទួល​បាន​ការ​សាទរ និង​កោតសរសើរ​ជា​ខ្លាំង ពី​សំណាក់​អតីត​កូន​ក្រុម​ចាស់ Jose Fonte ដែល​ធ្លាប់​សហការ​រួម​គ្នា​កាល​នៅ​ក្លឹប Lille។ កីឡាករ​សញ្ជាតិ​ព័រទុយហ្គាល់ ក៏​បាន​បង្ហើប​ដូច​គ្នា អំពី​ចំណុច​ដែល​គ្រូ​សញ្ជាតិ​បារាំង​ត្រូវ​កែ​តម្រូវ ដើម្បី​ឲ្យ PSG អាច​ស្គាល់​រសជាតិ​លើក​ពាន UCL ជា​លើក​ដំបូង។ នោះ​គឺ​តំបន់​ការពារ ពោល​ចង់​ឃើញ​ជញ្ជាំង​ជើង​ក្រោម​របស់​ក្លឹប​សេដ្ឋី​បារាំង អាច​រឹងមាំ​ជាង​នេះ និង​របូត​គ្រាប់​បាល់​តិច​ជាង​មុន។

ប្រាប់​ទៅ talkSPORT មិត្ត​រួម​ជម្រើស​ជាតិ​របស់ Ronaldo និយាយ៖ “Galtier ជា​គ្រូ​ពោរពេញ​ដោយ​បទពិសោធន៍ គាត់​ជា​អ្នកចាត់ការ​ល្អ​ម្នាក់ ហើយ​ក៏​ជា​បុរស​ដ៏​កំប្លែង​ម្នាក់​ផង​ដែរ គាត់​ពូកែ​ក្នុង​ការ​ពន្យល់ អំពី​អ្វី​ដែល​គាត់​ចង់​បាន​ពី​កីឡាករ និង​អ្វី​ដែល​គាត់​រំពឹង​ចង់​ទទួល​យក នៅ​លទ្ធផល​បញ្ចប់ បើ​និយាយ​ពី​បាល់ទាត់​បារាំង ខ្ញុំ​ហ៊ាន​ថា គ្មាន​អ្នកចាត់ការ​ណា​ដឹង​ច្បាស់​ជាង​គាត់​ឡើយ គាត់​ឈ្លាសវៃ គាត់​ដឹង​សព្វគ្រប់​អំពី​ដំណោះស្រាយ​ទៅលើបញ្ហាដែល​ត្រូវ​ជួប​ប្រទះ”។

បន្ត​ពាក់ព័ន្ធ​នឹង​ចំណុច​ដែល PSG ត្រូវ​ពង្រឹង​ដើម្បី​ឈ្នះ​ពាន UCL ខ្សែ​ការពារ Fonte សង្កត់​ធ្ងន់​បែប​នេះ៖ “ខ្ញុំ​គិត​ថា​បញ្ហា​គឺ​ត្រង់​តំបន់​ការពារ ដែល​ក្លឹប​នៅ​មាន​ការ​ខ្វះខាត ហើយ​ពួក​គេ​នឹង​មិន​អាច​យក​ឈ្នះ​បាន​ឡើយ សម្រាប់​ការ​លេង​ទល់​ក្លឹប​ធំ​ដូច​ជា Man City, Liverpool, Bayern Munich និង Real Madrid ជា​ដើម ដូច្នេះ PSG នឹង​ធ្លាក់​ទៅ​ក្នុង​បញ្ហា ដោយមិនខ្វល់ថា ​តំបន់​ប្រយុទ្ធ​ខាង​លើ​ល្អ​ប៉ុណ្ណា​ទេ បើ​ស្ទើរ​ការពារ របូត​គ្រាប់​បាល់​ច្រើន បែប​ហ្នឹង​ក៏​ជា​ដើមចម​នាំ​ឲ្យ​ក្រុម​បរាជ័យ​ដែរ ដូច្នេះ​ហើយ​ Galtier ត្រូវ​តែ​ពង្រឹង​ឲ្យ​រឹងមាំ​ជាង​នេះ នៅ​តំបន់​ជើង​ក្រោម”។

បញ្ជាក់​ឲ្យ​ដឹង​ថា តាម​ដំណឹង​អ្នកចាត់ការ​ថ្មី បាន​ជ្រើសរើស​រួចរាល់​ហើយ​នូវ​តំណែង​អ្នកចាំទី​ដៃ​ទី​មួយ​សម្រាប់​រដូវ​កាល​បន្ទាប់ គឺ​នឹង​ប្រើប្រាស់ Gianluigi Donnarumma ជា​ជាង Keylor Navas។ ចំណែក​ឯ​ជញ្ជាំង​ការពារ យើង​នឹង​រង់ចាំ​មើល តើ Sergio Ramos អាច​បង្កើន​លទ្ធភាព​ឲ្យ​ល្អ​ប្រសើរ​ជាង​មុន​ដែរ​ឬ​ទេ ក្នុង​ការ​ចាប់​ដៃ​គូ​ជាមួយ Marquinhos ស្រប​ពេល​ដែល​ស្លាប​សង​ខាង វត្តមាន Achraf Hakimi និង Presnel Kimpembe គឺ​រំពឹង​នៅ​តែ​អាច​ធានា​បាន​ពី​ពេលវេលា​ឈរ​ជើង។

បន្ត​ទៅ​ការ​លើក​ឡើង​មួយ​ផ្សេង​ទៀត ពាក់ព័ន្ធ​នឹង​អនាគត​មិត្ត​រួម​សញ្ជាតិ Cristiano Ronaldo ក៏​ត្រូវ​បាន Fonte សង្កត់​ធ្ងន់​ថា ទ្រនំ​បន្ទាប់ CR7 គួរ​តែ​ផ្លាស់​ទៅ​ក្លឹប Real Madrid ដែល​ជា​កន្លែង​សក្ដិសម​បំផុត។ លោក​បាន​សង្កត់​ធ្ងន់ ថា​បើ​សម្រាប់​កីឡាករ សក្តិសមនឹងទៅចុះចូលនៅទីនោះ ជាងក្លឹបណាៗទាំងអស់ តែ​សំណួរ​ត្រង់​ថា ក្លឹប​ស្តេច​ស Madrid គិត​ចង់​ទទួល​យក​ Ronaldo ជា​ថ្មី​ឬ​អត់។

រំឭក​ឲ្យ​ដឹង បុរស​វ័យ ៣៧ ឆ្នាំ បាន​ក្លាយ​ជា​អ្នក​ស៊ុត​បញ្ចូល​ទី​ច្រើនជាងគេ​បង្អស់​ឲ្យ​ក្លឹប Real Madrid ហើយ​ក៏​បាន​លើក​ពាន​រង្វាន់ Champions League ៤ លើក​នៅ​ទី​នោះ លាយឡំ​នឹង​ពាន​ធំ​តូច​ជា​ច្រើន មុន​ផ្លាស់​ចេញ​មក​កាន់ Juventus និង Man Utd ទល់​សព្វថ្ងៃ៕

ប្រភព៖ បរទេស