បន្ទាប់​ពី​បញ្ចប់​ការ​ប្រកួត​រវាង​ម្ចាស់ផ្ទះ​កាតារ ដែល​បរាជ័យ​ក្រោម​លទ្ធផល ០-២ ទល់​អេក្វាឌ័រ​កាល​ពី​យប់មិញ ងាក​មក​ថ្ងៃ​នេះ​លើ​ទំព័រ CTS Sports ក៏​នឹង​មាន​កាលវិភាគ​ផ្សាយបន្តផ្ទាល់​ ៣ គូ​ផ្សេង​ទៀត តែ​មួយ​គូ​បើក​ឆាក​គឺ​ពិសេស​បំផុត ជា​ការ​ប៉ះ​គ្នា​រវាង​ជើង​ឯក World Cup សម័យ​កាល​ឆ្នាំ ១៩៦៦ គឺ​តោ​កំណាច​អង់គ្លេស ត្រូវ​ជួប​ស្តេច​ក្រុម​ប្រចាំ​តំបន់​អាស៊ី​គឺ​អ៊ីរ៉ង់ នា​វេលា​ម៉ោង ០៨:០០ នាទី​យប់។

៣ ពិន្ទុ​នៅ​ជំនួប​ជុំ​ដំបូង គឺ​សំខាន់​ខ្លាំង​ណាស់​រវាង​ក្រុម​ទាំង​ពីរ ដ្បិត​អី​ជម្រើស​ជាតិ​ដែល​ត្រូវ​តតាំង​ពីរ​ផ្សេង​ទៀត គឺ​រវាង​សហរដ្ឋអាមេរិក និង​វែល នៅ​ក្នុង​ពូល B។ យ៉ាង​ណា​មុន​ការ​ប្រកួត​មក​ដល់ កីឡាករ​ជា Top Scorer ប្រចាំ​ប្រវត្តិសាស្ត្រ​អង់គ្លេស គឺ Wayne Rooney ក៏​បាន​ផ្តល់​យោបល់​ណែនាំ​ទៅ​កាន់​ជម្រើស​ជាតិ​របស់​ខ្លួន អំពី​យុទ្ធសាស្រ្ត​និង​តាក់តិច ក្នុង​ការ​យក​ឈ្នះ​ទៅ​លើ​អ៊ីរ៉ង់ មាន​អ្នកចាត់ការ Carlos Queiroz ក៏​ជា​បុរស​ម្នាក់​ខ្លួន​ធ្លាប់​ស្គាល់​ច្បាស់​បំផុត​ផង​ដែរ​ក្នុង​អាជីព។

Carlos ធ្លាប់​ជា​អតីត​ជំនួយ​ការ​លោក Sir Alex Ferguson ក្នុង​សម័យ​កាល​ដឹកនាំ Wayne Rooney ជា​កីឡាករ លើក​ពាន Champions League, League Cup និង Premier League ៣ សម័យ​កាល​នៅ​បិសាច​ក្រហម។ ប្រាប់​តាម​រយៈ​សារព័ត៌មាន The Times បុរស​វ័យ ៣៧ ឆ្នាំ សង្កត់​ធ្ងន់​ថា អង់គ្លេស​ត្រូវ​តែ​ប្រើប្រាស់​ខ្សែ​ការពារ​ស្លាប​ដ៏​ជំនាញ ហើយ Trent Alexander-Arnold ចាំ​បាច់​ត្រូវ​តែ​មាន​វត្តមាន​ក្នុង​ប្រកួត​យប់​នេះ ព្រោះ​របៀប​វាយលុក​ដោយ​ប្រើ​ការពារ​ស្លាប ទើប​មាន​សង្ឃឹម​ច្រើន​នឹង​អាច​យក ៣ ពិន្ទុ​ពី​អ៊ីរ៉ង់។

Rooney និយាយ៖ “Carlos គាត់​ជា​មនុស្ស​ដែល​ចូលចិត្ត​រៀបរយ​កីឡាករ ឲ្យ​មាន​ការ​គោរព​វិន័យ ហើយ​របៀប​ដឹកនាំ​គាត់ គឺ​សម្រុក​លឿនៗ ហើយ​មួយ​គ្រាប់​ដំបូង​គឺ​ចាំ​បាច់​បំផុត ម្ល៉េះ​ហើយ​បើ​អង់គ្លេស​អាច​រក​បាន​គ្រាប់​បាល់​នាំ​មុខ​មុន​ពី​ដើម​តង់ នោះ​ប្រាកដ​ជា​នឹង​ស្រួល​ចិត្ត តែ​បើ​បណ្តោយ​ពេលវេលា​កាន់​តែ​យូរ ពួក​គេ​នឹង​កាន់​តែ​ទទួល​សម្ពាធ​មិន​ខាន”។

លោក​បន្ត​ថា៖ “គ្រប់​ពេល​ដែល​អ្នក​តតាំង​ក្រុម​មាន​របៀប​លេង​ដូច​ជា​អ៊ីរ៉ង់ អ្នក​ចាំ​បាច់​ត្រូវ​តែ​មាន​ប្រព័ន្ធ​នៅ​តំបន់​ស្លាប​ពេញ​លក្ខណៈ​ល្អ​បំផុត អ្នក​មើល​ចុះ​ដូច Manchester City លេង របៀប​ពួក​គេ​គឺ​ប្រើ​ស្លាប​ខាង​ក្រោម ដើម្បី​ចោះ​បាល់​ទៅ​ក្នុង​ប្រអប់​គូ​ប្រជែង ត្រង់​ហ្នឹង​ហើយ​ទើប​ខ្ញុំ​ជ្រើស​យក Trent Alexander-Arnold ចាំ​បាច់​ត្រូវ​តែ​មាន​ឈ្មោះ​ក្នុង​ការ​ប្រកួត​នេះ ព្រោះ​គេ​មាន​សមត្ថភាព​ពូកែ​ក្រុស​បាល់​ចូល​ទៅ​ក្នុង​ប្រអប់”។

គួរ​ឲ្យ​ដឹង​ដែរ​ថា អង់គ្លេស​ជា​ក្រុម​ឈរ​ចំណាត់ថ្នាក់ FIFA Ranking ល្អ​ដាច់​គេ​ក្នុង​ពូល B ពោល​គឺ​ឈរ​លេខ ៥ ស្រប​ពេល​សហរដ្ឋអាមេរិក​ឈរ​លេខ ១៦ វែល​ឈរ​លេខ ១៩ និង​អ៊ីរ៉ង់​ឈរ​លេខ ២០ ឬ​រាប់​បាន​ជា​ក្រុម​លំដាប់​ទី ១ នៅ​តំបន់​អាស៊ី។ កន្លង​មក​អ៊ីរ៉ង់​ក៏​ធ្លាប់​បង្កើត​កំណត់ត្រា តាម​រយៈ​ការ​យក​ឈ្នះ​កម្ពុជា នៅ​វគ្គ​ជម្រុះ​បឋម​ជុំ​ទី ២ World Cup ដោយ​ទាំង​ពីរ​ជើង សរុប​គ្រាប់​បាល់ ២៤-០៕

ប្រភព៖ បរទេស​​