អ្នក​ខ្លះ​ថា​ជា​អន្ទាក់ អ្នក​ខ្លះ​ថា Real លាក់​ជើង តែ​ការ​លើក​ឡើង​របស់​អ្នកចាត់ការ​លោក Carlo Ancelotti បាន​និយាយ​តាំង​មុន​ការ​ប្រកួត ថា​ពុំ​បាន​ផ្តោត​តែ​លើ Champions League ហើយ​ព្រលែង La Liga អី​នោះ​ទេ ជា​រួម​ពាន​ទាំង​ពីរ​គឺ​សុទ្ធមាន​ភាព​ស្មុគស្មាញ តែក្លឹប​បាន​ដាក់​គោលដៅ​ធំ​ចង់​លើក​ទាំង ២ ព្រម​គ្នា។

តែ​យ៉ាង​ណា​ឱកាស​ឆ្ពោះ​ទៅ​ដំណើរ​កាន់​ពាន​លីគ​កំពូល​អេស្ប៉ាញ ហាក់​កាន់​តែ​ឃ្លាត​ឆ្ងាយ បន្ទាប់​តែ​មក​ជួប​ទុក្ខ ត្រូវ​របូត ៣ ពិន្ទុ​ឲ្យ​ក្លឹប​កម្រិត​បង្គួរ​ Girona FC ដោយ​លទ្ធផល ៤-២ កាល​ពី​យប់មិញ។ នេះ​គិត​មក​ដល់​ជុំ​ទី ៣១ អធិរាជ​ស Madrid មាន ៦៥ ពិន្ទុ នៅ​ពី​ក្រោយ ១១ ពិន្ទុ ហើយ​ក៏​ដើរ​មុន​មួយ​ជុំ​លើ​ Barcelona ជា​ក្លឹប​ឈរ​កំពូល​តារាង។

ការ​ប៉ះ Girona យប់មិញ បើ​ឈ្នះ​អាច​ជា​រឿង​ធម្មតា ដល់​តែ​ចាញ់​កាល​ណា ស្រាប់​តែ​ផ្ទុះ​រឿង​គួរ​ឲ្យ​ចាប់​អារម្មណ៍​មក​ភ្លែត ហើយ​ទំព័រ CTS Sports ក៏​មិន​បង្អង់​យូរ​នោះ​ដែរ គឺ​តែងតែ​សម្រិតសម្រាំង​លើក​មក​ចែករំលែក​ជូន​បងប្អូន​ឲ្យ​បានដឹងមុនគេបង្អស់។

តើ​អ្នក​ធ្លាប់​បាន​ដឹង​ទេ​ថា ក្លឹប​កំពុង​ឈរ​លេខ ៩ នៅ La Liga ដែល​ទើប​ផ្តល់​ភាព​អាម៉ាស់​ជូន Real Madrid កាល​ពី​យប់មិញ គឺ​ជា​ក្លឹប​បងប្អូន ឬ​ជា​ក្លឹប​សម្ព័ន្ធ ក្រោម​ការ​កាន់កាប់​តែ​មួយ​របស់​ម្ចាស់​ធំ City Football Group ឬ​ហៅ​កាត់ CFG។

ជា​ការ​ពិត Girona FC ​ត្រូវ​បាន​កាន់កាប់​ដោយ City Football Group ជា​ម្ចាស់​ភាគហ៊ុន​ធំ ដល់ ៤៧ ភាគរយ តែ​ក៏​មាន​ចំណែក​របស់​លោក Pep Guardiola និង​ប្អូន​ប្រុស​បង្កើត​គឺ Pere Guardiola មាន​ភាគហ៊ុន​រួម​ខាង​ក្នុង​នោះ ១៦ ភាគរយ។

ក្លឹប​ដែល​បាន​ងើប​ចេញ​ពី​លីគ​លំដាប់​ទី​ពីរ តាម​រយៈ​ឱកាស​នៃ​វគ្គ Playoff នា​រដូវ​កាល​ចាស់ គឺ​ជា​ក្លឹប​អេស្ប៉ាញ​តែ​មួយ​គត់ ដែល​កាន់កាប់​ដោយ City Football Group ក្នុង​ចំណោម​ក្លឹប​បាល់ទាត់​ផ្លូវការ​ទាំង ១២ ទូទាំង​សកលលោក។

នាំ​ឲ្យ​ស្គាល់​ជា​រួម តួ​យ៉ាង​គឺ៖ Manchester City នៅ​ប្រទេស​អង់គ្លេស, New York City នៅ​សហរដ្ឋអាមេរិក, Melbourne Victory នៅ​ប្រទេស​អូស្រ្តាលី, Montevideo City Torque នៅ​ប្រទេស​អ៊ុយរុយហ្គាយ, Girona នៅ​ប្រទេស​អេស្ប៉ាញ, Yokohama F.Marinos នៅ​ប្រទេស​ជប៉ុន, ESTAC Troyes នៅ​ប្រទេស​បារាំង, Bolivar FC នៅ​ប្រទេស​បូលីវី, Lommel SK នៅ​ប្រទេស​បែលហ្សិក, Mumbai City នៅ​ប្រទេស​ឥណ្ឌា, Sichuan Jiuniu នៅ​ប្រទេស​ចិន និង Palermo នៅ​ប្រទេស​អ៊ីតាលី។

ដោយឡែក​អំពី​ខ្សែ​ប្រយុទ្ធ​ Valentin Castellanos របស់ Girona កាល​ពី​យប់មិញ គឺ​ជា​អ្នក​រក​បាន ៤ គ្រាប់​ដំបូង​គេ​បង្អស់​ហើយ នៅ​ប្រកួត​ទោល ទល់ Real Madrid ក្នុង​ក្របខ័ណ្ឌ La Liga មិន​ធ្លាប់​កើត​មាន​ទាល់​តែ​សោះ នៅ​សតវត្ស​ទី ២១។ កីឡាករ​ជាតិសាសន៍​អាហ្សង់ទីន​រូប​នេះ ជា​សមាជិក​ស្ថិត​ក្រោម​ការ​គ្រប់គ្រង​របស់​ក្លឹប​អាណាព្យាបាល New York City ហើយ​បាន​ខ្ចី​ជើង​មក​ចូលរួម​ឲ្យ Girona កាល​រដូវ​ក្តៅ​ឆ្នាំ​ទៅ។

ដូច្នេះ​មាន​ន័យ​ថា Castellanos ក៏​ជា​សមាជិក​របស់ City Football Group ហើយ​ទៅ​ថ្ងៃ​មុខ ក៏​អាច​នឹង​មាន​ភាគរយ​មក​ចុះចូល​ជាមួយ​ក្លឹប Manchester City នៅ Premier League បានដោយយ៉ាងងាយ។ នេះ​ប្រើ​ត្រឹម​បំណែក​តូច នាំ​ឲ្យ Real ខូច​ចិត្ត​ប៉ុណ្ណឹង​ហើយ ចុះ​ទម្រាំ​ប៉ះ​មេ​សម្ព័ន្ធ​ធំ នៅ UCL នា​ថ្ងៃ​ទី ១០ ឧសភា​ខែ​ក្រោយ តើ​លទ្ធផល​នឹង​បែប​ម៉េច​ទៅ? យើង​នឹង​រង់ចាំ​តាមដាន​ការ​ផ្សាយ​បន្ត​ផ្ទាល់​ទាំង​អស់​គ្នា លើ​ទំព័រ CTS Sports៕

ប្រភព៖ បរទេស