- wolf246@gmail.com
World Cup លេង ២១ លើកហើយ នេះ ៤ លើក មានមនុស្សបុកទៅទស្សនាច្រើនបំផុត
- Wednesday 29 June 2022
- 01:58 PM
ព្រឹត្តិការណ៍បាល់ទាត់ពិភពលោក ដែលកំណត់ធ្វើឡើងរៀងរាល់ ៤ ឆ្នាំម្ដង គឺ FIFA World Cup បានចាប់ផ្តើមឡើងនៅឆ្នាំ ១៩៣០ ពោលមានអាយុកាល ៩២ ឆ្នាំហើយ ក៏ប៉ុន្តែវាបានខកខានធ្វើឡើង ២ លើក នៅឆ្នាំ ១៩៤២ និង ១៩៤៦ ដោយសារការរារាំងនៃសង្គ្រាមលោកលើកទី ២។ នៅឆ្នាំ ២០២២ សារនេះ កាតារបានកំណត់រៀបចំធ្វើជាម្ចាស់ផ្ទះ តែត្រូវរង់ចាំដល់ចុងឆ្នាំឯណោះ ទើបធ្វើការប្រកួត ដោយសារសីតុណ្ហភាពនៅប្រទេសអាស៊ីមួយនោះ ឡើងខ្ពស់ខ្លាំងនាពាក់កណ្ដាលឆ្នាំ។
ចុះអ្នកមានដឹងទេថា ក្នុងចំណោម World Cup ២១ សម័យកាលកន្លងមក តើសម័យកាលណាមួយ ដែលមានអ្នកចូលទស្សនាច្រើនបំផុត? CTS Sports ធ្វើការបង្ហាញដូចតទៅ៖
៤) ឆ្នាំ ២០១០ នៅអាហ្វ្រិកខាងត្បូង
នៅការប្រកួតទាំង ៦៤ ក្នុងទីក្រុងចំនួន ៩ សារនោះ មានអ្នកចូលទស្សនាប្រហែលជិត ៣,២ លាននាក់។ ប្រកួតដែលមានអ្នកចូលទស្សនាច្រើនបំផុត គឺនៅវគ្គផ្ដាច់ព្រ័ត្រ គ្រាអេស្ប៉ាញ យកឈ្នះហូឡង់ ១-០។ សារនោះ មានអ្នកទស្សនាផ្ទាល់ក្នុងកីឡដ្ឋានដល់ទៅ ៨៤ ៤៩០ នាក់ ខណៈជាមធ្យមនៅប្រកួតទូទៅ មានជិត ៥ មុឺននាក់។ បើតាមដឹង ខ្ទង់ចំណាយការរៀបចំ World Cup 2010 ចាយអស់ដល់ទៅ ៣,៦ ពាន់លានដុល្លារ។
៣) ឆ្នាំ ២០០៦ នៅអាល្លឺម៉ង់
អាល្លឺម៉ង់ធ្លាប់ធ្វើជាម្ចាស់ផ្ទះ World Cup ២ លើក ដោយកាលពីឆ្នាំ ១៩៧៤ និង ២០០៦។ ក៏ប៉ុន្តែគេចងចាំបំផុត នៅការប្រកួតនាសតវត្សទី ២១ ដែលមានសន្ទុះអ្នកទស្សនាយ៉ាងច្រើនកុះករ ដល់ទៅ ៣,៣៥ លាននាក់។
ខុសពី World Cup 2010/14 និង 18 ដោយប្រកួតមានអ្នកទស្សនាច្រើនបំផុត មិនមែនជាវគ្គផ្តាច់ព្រ័ត្រនោះទេ ផ្ទុយទៅវិញ គ្រាអាល្លឺម៉ង់ធ្វើជាម្ចាស់ផ្ទះ គឺនាវគ្គ ៨ ក្រុមចុងក្រោយ ក្នុងកីឡដ្ឋាន Olympiastadion នៃទីក្រុង Berlin ដោយចប់ ១២០ នាទី អាល្លឺម៉ង់ស្មើ ១-១ ទល់អាហ្សង់ទីន ក៏ប៉ុន្តែតដល់ការស៊ុតប៉េណាល់ទី ខាងម្ចាស់ផ្ទះបានយកឈ្នះ ៤-២។ សម័យកាលនោះ ម្ចាស់ជើងឯកបានទៅលើជម្រើសជាតិអ៊ីតាលី ដែលយកឈ្នះទៅលើបារាំង។
២) ឆ្នាំ ២០១៤ នៅប្រេស៊ីល
ប្រេស៊ីលចាយអស់ ១១,៦ ពាន់លានដុល្លារ លើការរៀបចំ World Cup ក្នុងទីក្រុងទាំង ១២ ហើយសារនោះ មានអ្នកទស្សនាផ្ទាល់ ប្រមាណ ៣,៤២ លាននាក់។ ក្នុងចំណោមការប្រកួតទាំង ៦៤ គឺមួយប្រកួតនាវគ្គចុងក្រោយ ដែលអាល្លឺម៉ង់យកឈ្នះអាហ្សង់ទីន ១-០ មានអ្នកទស្សនាច្រើនបំផុតដល់ទៅជាង ៧៤ ០០០ នាក់។
១) ឆ្នាំ ១៩៩៤ នៅសហរដ្ឋអាមេរិក
ជាសម័យកាលលើកចុងក្រោយ ដែលមានតែ ៥២ ប្រកួត ព្រោះមានក្រុមជម្រើសជាតិតែ ២៤ ប៉ុណ្ណោះមកចូលរួម។ វាជាពេលដែលមានអ្នកទស្សនាច្រើនបំផុតក្នុងប្រវត្តិសាស្ត្របាល់ទាត់ពិភពលោក ដោយមនុស្សជាង ៣,៥៨ លាននាក់ បានមកចូលរួមទស្សនា ហើយនាវគ្គផ្ដាច់ព្រ័ត្រ ដែលប្រេស៊ីល យកឈ្នះទៅលើអ៊ីតាលី មានអ្នកគាំទ្រដល់ ៩៤ ០០០ នាក់ឯណោះក្នុងកីឡដ្ឋាន៕
ប្រភព៖ បរទេស